Qasidat Khataya

قصيدة خطايا
 
الدكتور جورج نقولا الحاج
 
اشتقلها. راح يزورا يوم الأحد. قالتلو امها راحتْ ع الكنيسة تصلي. زعل كتير...وتركلها هالقصيدة تحت مخدتها.
 
موال
 
طلّ الصبحْ...قومي معي صَلي
وبالقلبْ... هَمّ وغم.ْ..  لا تخلي
لو حافظا القرآ نْ...  والإنجيلْ
وصَوم وصلا... ايامك وترتيلْ
إلا ما عن قلبك همومِكْ شِيلْ
وتحفظيني... شِعر...ومواويلْ
وتضْوي صبيعكْ شمعْ وقناديلْ
وسامحكْ عن ألفْ جيلْ وجيلْ
كافرة... يا بنتْ... بتضلي
 
تركتي بقلبي نارْ...وبعيني دموعْ
يا رايحا تتعبّديْ...وتضوي شموعْ
عليكي خطايا كتير...   لازم تنغَفرْ
وما بيكفي بسْ... يغفرها يسوع
 
عليكي خطايا ما بيحواها كتابْ
يا فاتحا بقلبْ شاعر الفْ بابْ
لا إعترافكْ عادلو كترْ العذابْ
ولا شهوة القداسْ بتطفّي ولوعْ
 
يا سارقا من العينْ لعيونكْ غَفا
بنظرتِكْ إيمانْ عندي بالشِفا
لا تقولي نورْ قلبك  إنطفا
دَربْ الغرام بعيد ونزولو طلوع.
 
تركتي بقلبي نارْ...وبعيني دموعْ
يا رايحا تتعبدي...وتضوي شموع
عليكي خطايا كتير... لازم تنغفرْ
وما بيكفي بس...يغفرها يسوع.
 
جورج نقولا الحاج. منصورية المتن. لبنان.
تشرين الأول. 2023